今早我發夢痛哭大叫醒了，醒後還久久難以平伏。
夢中因機緣巧合看見男神古天樂，我突然就向他推薦自己。一開始古生非常有禮貌地推我，後來因為我死纏爛打，他逼於無奈講出真話，話我已老。我話老都可以演戲㗎，我演戲好好㗎，就算係演藝學院讀書都攞過兩次最佳女主角，然後又把自己兩大本厚厚的履歷拿給古生看，夢中的古生叫我接受現實，說我根本只是咖哩啡。
這時，副導演突然走來叫大家埋位，原來套電影中，古生係監製，而我真是在套電影中飾演其中一個茄喱啡路人。當停機後，古生走過來跟我說，其實做茄喱啡無話唔好，有人做一世茄喱啡都好開心！我抓住古生說，我真係唔係茄喱啡，我自己寫過演過兩套電影，仲有一套電視劇。他話咁係因為你識人啫，你根本只係配做一個茄喱啡。
之後我崩潰了，我告訴他，我係靠不斷寫劇本去打動人，逐個去敲門，先拍到套電影。我反問，古生你是演藝人協會會長，不是應該給機會新人，提拔他們嗎？難道你只提拔有後台的新人，有熟人介紹的新人？但古生對我説，唔關你事，你唔係，然後一直耍手擰頭，之後我好羞辱咁趴到枱底，一邊哭一邊把早已變成垃圾的兩份履歷書拿走。我淚眼縱橫地說，我只係因為唔識應酬、唔識飲酒、淨係識演戲，所以我先一直無真正入到個影視圈，但我唔係一個茄喱啡，我係一個演員⋯如是者，我便一邊哭，一邊敗走了。
夢醒後，我全身乏力疼痛，兩眶全是眼淚，應該是我一邊發夢一邊崩緊全身、揸緊拳頭的緣故。
清醒後，我被自己嚇壞了，也為自己感到很悲哀，原來這就是我的內心世界。也可能，我最近一直逼自己去放棄夢想、放棄堅持做演員的夢想，逼到自己走投無路，所以只能跑到夢裡去。
P.S. 對不起，古生，讓你成了我夢中的受害者，你是無辜的。
Search